Gwefan gwybodaeth i bleidleiswyr i'w lansio wrth i arolwg ddangos nad oes gan y mwyafrif hyder pleidleisio
Bydd Bwrdd Rheoli Etholiadol Cymru yn lansio bwrwpleidlais.cymru ym mis Mawrth 2026.
Mae'r wefan wedi'i chynllunio i roi hyder i bleidleiswyr yn etholiad y Senedd ar 7 Mai wrth i pôl piniwn newydd dangos bod dros hanner Cymru yn brin o hyder bod ganddynt yr holl wybodaeth sydd ei hangen arnynt.
Bydd bwrwpleidlais.cymru yn cynnwys gwybodaeth am sut i bleidleisio, beth mae'r Senedd yn ei wneud, pwy yw'r ymgeiswyr a beth maen nhw'n ei gynrychioli. Bydd hefyd yn egluro sut mae'r system etholiadau'n gweithio ac yn cynnwys gwybodaeth am bynciau eraill sy'n gysylltiedig â'r etholiad.
Mae pôl piniwn Survation a gomisiynwyd gan Gomisiwn Democratiaeth a Ffiniau Cymru, sy'n gyfrifol am y Bwrdd Rheoli Etholiadol, wedi dangos bod 51% o bobl 16+ oed yng Nghymru yn brin o hyder bod ganddynt yr wybodaeth sydd ei hangen arnynt cyn etholiad y Senedd ar 7 Mai 2026.
Dim ond 16% o bobl oedd â llawer iawn o hyder bod ganddynt yr holl wybodaeth sydd ei hangen arnynt i wneud penderfyniad pan fyddant yn pleidleisio, tra mai dim ond 13% oedd â llawer iawn o hyder eu bod yn gwybod ble i gael gwybodaeth am y newidiadau sy'n digwydd yn etholiad eleni.
Yn hollbwysig, dywedodd o leiaf chwarter (25%-28%) y byddai teimlo'n ansicr ynghylch gwahanol agweddau ar sut mae etholiad y Senedd yn gweithio yn eu gwneud yn llai tebygol o bleidleisio.
Archwiliodd yr arolwg hefyd ble mae pobl yn meddwl y gallant ddod o hyd i wybodaeth am ymgeiswyr yn eu hardal, a pha mor hyderus y maent yn teimlo ynghylch gwybod ble i ddod o hyd i wybodaeth ddibynadwy am etholiadau Cymru.
Roedd 35% o bobl yn brin o hyder ynghylch dod o hyd i wybodaeth am ymgeiswyr sy'n sefyll yn eu hardal, tra bod 28% yn brin o hyder ynghylch dod o hyd i wybodaeth ddibynadwy am etholiadau Cymru.
Mae 49% o bobl yn credu bod gwefannau newyddion lleol neu Gymreig yn lleoedd da i ddysgu am ymgeiswyr yn eu hardal. Byddai 43% yn gwirio gwybodaeth swyddogol gan y Comisiwn Etholiadol, tra byddai 42% yn edrych ar wefan eu cyngor lleol.
Mae mannau eraill lle byddai pobl yn chwilio am wybodaeth am ymgeiswyr yn cynnwys gwefannau pleidiau cenedlaethol neu ddeunyddiau ymgyrchu (41%), postiadau cyfryngau cymdeithasol gan bleidiau gwleidyddol neu ymgeiswyr (30%), gwefannau trydydd parti, fel Who Can I Vote For? (23%), a gofyn yn yr orsaf bleidleisio (15%).
Bwriad bwrwpleidlais.cymru yw bod yn siop un stop i bleidleiswyr gael mynediad at yr holl wybodaeth sydd ei hangen arnynt am yr etholiad mewn un lle.
Wrth wneud sylwadau ar y canfyddiadau hyn, dywedodd Prif Weithredwr Comisiwn Democratiaeth a Ffiniau Cymru, Shereen Williams MBE OStJ:
“Dylai pawb gael y cyfle i bleidleisio’n hyderus yn etholiad y Senedd eleni, ond mae chwarter o bobl yng Nghymru yn llai tebygol o ddefnyddio eu pleidlais oherwydd diffyg gwybodaeth.
“Rhoi’r wybodaeth sydd ei hangen ar bobl a meithrin eu hyder pleidleisio yw’r rheswm pam rydym yn lansio bwrwpleidlais.cymru ym mis Mawrth eleni.
“Os oes gennych gwestiynau am sut i bleidleisio, ble i bleidleisio, neu dros bwy i bleidleisio, neu os ydych chi eisiau gwybod sut mae’r system bleidleisio newydd yn gweithio, neu beth mae’r Senedd yn ei wneud, byddwch chi’n gallu dod o hyd i’ch atebion ar bwrwpleidlais.cymru o ddechrau mis Mawrth.”